2026 தமிழக சட்டமன்றத் தேர்தலை முன்னிட்டு, நடிகர் விஜய் தலைமையிலான தமிழக வெற்றிக் கழகம் (தவெக) தனது தேர்தல் பணிகளைத் தீவிரப்படுத்தியுள்ளது. அக்கட்சியின் சார்பில் தேர்தலில் போட்டியிட விரும்புவோருக்கான விருப்பமனு விநியோகம் இன்று கோலாகலமாகத் தொடங்கியது. இது குறித்து செய்தியாளர்களிடம் பேசிய தவெக துணைப் பொதுச் செயலாளர் நிர்மல் குமார், “கட்சி நிர்வாகிகள் மட்டுமல்லாது, ஆயிரக்கணக்கான பொதுமக்களும் மிகுந்த ஆர்வத்துடன் வந்து விருப்பமனுக்களைப் பெற்றுச் செல்வது ஆச்சரியம் அளிக்கிறது” என்று தெரிவித்தார். முன்னதாக, கட்சியின் முதல் மாநாடு மற்றும் உறுப்பினர் சேர்க்கை வெற்றிகரமாக முடிந்ததைத் தொடர்ந்து, தற்போது வேட்பாளர் தேர்வுக்கான முதற்கட்டப் பணிகளை விஜய் முடுக்கிவிட்டுள்ளார்.
வேட்பாளராக விரும்புவோர் உரிய ஆவணங்களுடன் வந்து விண்ணப்பங்களைப் பெற்றுச் செல்கின்றனர். குறிப்பாக இளைஞர்கள் மற்றும் பெண்கள் மத்தியில் தவெக மீதான ஆர்வம் அதிகரித்து வருவதை இந்த விருப்பமனு விநியோகம் காட்டுவதாக அரசியல் பார்வையாளர்கள் கருதுகின்றனர். தமிழகத்தின் பல்வேறு மாவட்டங்களில் இருந்தும் தொண்டர்கள் சென்னை நோக்கிப் படையெடுத்து வருகின்றனர். 234 தொகுதிகளிலும் தனித்துப் போட்டியிடும் முனைப்பில் உள்ள தவெக,
தகுதியான வேட்பாளர்களைத் தேர்வு செய்வதில் அதிகக் கவனம் செலுத்தி வருகிறது. வரும் நாட்களில் விருப்பமனுக்கள் பெறப்பட்ட பிறகு, நேர்காணல் மற்றும் கள ஆய்வு நடத்தப்பட்டு இறுதி வேட்பாளர் பட்டியல் அறிவிக்கப்படும் என எதிர்பார்க்கப்படுகிறது. விஜய்யின் நேரடி மேற்பார்வையில் நடைபெறும் இந்தத் தேர்தல் பணிகள் அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது…
